උදේ පාන්දරම සීලිං නැන්දාගේ චීත්තය ඉස්සී ඇත. ඇය අතකින් චීත්තය උස්සාගෙන වත්තටම ඇසෙන්නට "කුණුහරුප මිශ්‍ර මොර" දෙන්නට පටන් ගෙන ඇත..
- "ඈ යකෝ.. ගෑස් ඉවර වෙලා දර වලින් උයන්න අරං දවස් පහක් වත් නෑ. මං අපේ මූසල මිනිහට කිව්ව ටැංකිය එළියට දාන්න එපා කියල.. අනෙ අම්මේ මගෙ නිල් පාට ගෑස් ටැංකිය.. දරුවෙක් වගේ අම්මප.. මේක උස්සපු එකාගේ අම්ම්$$$$ $@#%$ $%@$%$@#!@ ....... "
මුළු වත්තම සීලිං නැන්දලාගේ ගේ ළඟය. මිනිස්සු ඇස් ගෙඩි දෙක එළියටම දමාගෙන බලා සිටින්නේ, වත්තෙ පංසලේ ලොකුහාමුදුරුවන්ටත් පෙර ගෑස් ටැංකිය රහත් වීම අදහාගත නොහැකිවය..!! ඇරත් සීලිං නැන්දාගේ චීතතයේ පහළ වාටිය ගැන සියල්ලන්ම දන්නා බැවින්, වෘතීමය හොරෙකු උව, දින පහක් බඩගින්නේ සිටියද මෙවැනි ක්‍රියාවකට පෙළඹෙතැයි සිතීම උගහටය..
ප්‍රශ්නය දුරදිග ගොසිනි. අහල පහළ නම් හත අටක් සොරකමට සමබන්ධ යැයි කන් ඇති බිත්ති විසින් සොයාගෙන ඇත. ඒ අතුරින් ප්‍රධාන සැකකරු කඩේ වැඩකරන අහමඩ් මල්ලිය. සීලිංගේ "මූසල මිනිහා" වූ සීමන් විසින් කරගෙන යනු ලබන, මන්ත්‍රී පර්මිට් එක, පොලිස් අනුග්‍රහය සහ දේශීය නිශ්පාදන වලට දෙනු ලබන සිංහ ලකුණ හිමි ජංගම තැබෑරුම් පොළේ හොඳම ගැනුම් කරුවා අහමඩ් මල්ලීය. කලක් තම දෝණියැන්දාව චීත්ත නැතිවම "අහමඩ් පුතාට" දීමට ලක ලැහැස්ති වූ සිලිං නැන්දාට, පන්සලේ ලොකු හාමුදුරුවන් විසින් දෙසූ බණකින් පසු හම්බයන් පෙන්නන්නට බැරිය. ඇරත් කඩේට යන හැම දිනකම බඩු වල ගාන පොතට දමන විට, බඩු වල මිළ වැඩී වී ඇති බව දැනී හටගන්න කෝපය අහමඩ්ගේ ගිනුමට දමා එන සීලිං ට දැන් "අහමඩ් පුතා", "තම්බියා" වී ඇත.
ප්‍රශ්නය ගිය දුර කොතරම්ද යත් අවසානයේ මෙය හම්බයන්ගේ කුමණ්ත්‍රණයක් ලෙසත්, අහමඩ් විසින් ගෑස් ටැංකිය පල්ලියට ගෙන ගොස් ඇති බවත් තහවුරු කෙරිණි. ප්‍රශ්නයට එඩිතරව මැදිහත් වූ සිල්වා මන්ත්‍රී තුමා තම චණ්ඩි ගෝලයන් යොදවා ගෑස් ටැංකිය සොයා ගත් අතර එය පල්ලියේ කුස්සියේ තිබී තමන්ම ගොස් ගෙනා බවට ප්‍රකාශ කරමින් සීලිං නැන්දාගේ අතටම භාර දෙන විට සීලිං නැන්දාගේ චීත්තය නිම්හිම් නැති ප්‍රීතියකින් සැලෙන්නට විය.
පසුව ප්‍රශ්නය හමාර වූ ප්‍රීතිය නිමිත්තෙන්, සිල්වා මංත්‍රී තුමා, පොලීසියේ ලොකු මහත්තය හා පන්සලේ ලොකු හාමුදුරුවන් මූලිකත්වය ගෙන සංවිධානය වූ "චාම්" උත්සවය ඉතා උත්කර්ශවත් අයුරින් පැවැත්වීය. කෑම සීලිං නැන්දාගෙන් වූ අතර බීම සීමන් ගෙනි. ආරාධිත අමුත්තන් ලෙස ශාසනය උදෙසා වූ අමාත්‍යාංශයක ඉතා උසස් ලේකම් තුමෙක් හා එතුමාගේ බිරිඳ පැමිණ සිටියහ.
පළමු කතාව කල පොලිසියේ ලොකු මහත්තයා විසින් අහම්ඩ්ගේ කොලුවාගේ ඉල ඇට කැඩූ අයුරු රසවත්ව කියා සිටි අතර, දහ අට හැවිරිදි අහමඩ් වසර 20 ක් තිස්සේ මෙලස සොරකම් කරන බවද ප්‍රකාශ කළේය.
ඉන් පසු කතාව ආරම්භ කළ මන්ත්‍රී තුමා විසින් ගෑස් ටැංකියේ වටිනාකම පැහැදිළි කර දුන් අතර හිස් උවද එයට "ගෑස් ටැංකිය" ලෙස ආමන්ත්‍රණය කිරීම නිසා එයට විශාල වටිනා කමක් හිමි වන බවද කියා සිටියේය.
ඉන්පසුව, පුරවිද්‍යාව(ට ) කෙළ පැමිණි අපේ චක්‍රවර්තී හමුරුවෝ ඉතා හරබර දේශනයක් කළ සේක. නිවෙස් වල ගෘහණියන් ගෑස් ටැංකි වලට ඉතා අශා කරන බවත් ඒ නිසාම එයාල ටැංකිය නැවත මාරු නොකර ඉතා දීර්ඝ කාලයක් තබාගන්නා බවද දේශනා කළ සේක. මේ නිසා මේ ගෑස් ටැංකි වලට පෞරාණික වටිනාකමක් එකතු වන බවත් අතිතයේ භාවිතා කළ මෙවැනි පෞරාණික ගෑස් ටැංකි තවමත් පොළව යට නිදන්ව තිබෙනා බවත් ප්‍රකාශ කළ උන්වහන්සේ, එම පෞරාණික "ගෑස් ටැංකි" නිදන් රජය විසින් ගොඩ ගත ගැනීමට රජය දරන ප්‍රයත්නයට තම ප්‍රණාමය පුද කළ සේක.
අවසාන කතාව හිමි වූ අමාත්‍යාංශ ලේකම් තුමා මිනිසුන්ගේ සිත හා දියුණුව යන්න තේමා කොට ගෙන විශාරද අදහස් දක්වන්නට විය. අප දියුණු රට වලින් දියුණු වීමට හේතු වූ ඵලයන් ලබා ගත යුතු බවත් එයට උදාහරණයක් ලෙස චිනයේ ෆෙන්ෂුයි ක්‍රමය හඳුන්වා දිණි. අවසානයේ නිවෙස් වල මෙවන් විපත් සිදු නොවීමට හා දියුණුවෙන් දියුණුවට පත් වීමට මේ පිළිම ලඟ තබාගෙන වන්දනා මාන කරන්න යැයි පවසා එතුමගේ බිරිඳ විසින් එළියේ මේසයක් උඩ තබාගෙන සිටි සිනාසෙන තරබාරු පිළිම වහන්සේ නමක් පෙන්වූ අහර ඒවා සහන මිලට මෙතනින් ලබාගත හැකි බවද පවසන විට උත්සව ශාලාවේ සියළුම චීත්ත "සාදු සාදු" නාදයෙන් තෙත් වී ගියේය.
No comments:
Post a Comment