හති.. දැන්නම් හොඳටම හති.. කුණු මාළු කෑල්ලක් කෑවට තාම වතුර ටිකක් බිව්වේ නෑ.. කානුවේ වතුර නොබී ආවෙ හොඳ වතුර ටිකක් හම්බෙයි කියල බලාපොරොත්තුවක් ඇතිව... ඒත් ඒක නිකන් මේ කට්ට දවාලෙ ඉර යටට වළාකුලක් එයි කියල බලං ඉන්නව වගේම තමා.. මෙතනින් ඉගිල්ලෙන්න කලින් හොඳ හුස්මක් ගන්න හිතුවත් මේ ගිනි අරං තියෙන දූවිලි සාගරයේ කොහෙද හොඳ හුස්මක්..!! මම තාම ටවුන්හෝල් එකේ මුදුනෙ..!! ආ කියන්න අමතක උනා.. මම කපුටෙක්..!! කලු කැත කපුටෙක්..!!
මේක උඩට මේ ගින්න හොඳට පේනව. තාර පොලවෙන් මැගී නූඩ්ල්ස් වගේ උඩට ඇදෙන සංවහන රේඛා, පේමන්ට් එකේ හිඟා කන කළුවගෙ පිට හූරගෙන යනව පේනව. පව් ඌ. වෘත්තීය හිඟන්නෙක් නිසා ඌට මීට වඩා හොඳ පරිසරයක් ලැබෙන්න ඕනෙ කියලයි මට හිතෙන්නේ. ඉගිල්ලෙන්න තටු නැති එක ගැන ඌට අවුලක් නැති උනාට මේ ගින්නෙ පිච්චෙන එක ගැන ඌට අවුලක් තියෙන්න ඕනෙමයි කියලයි මට හිතෙන්න.. ආහ්.. ඔන්න කළුව මං දිහා බැලුව. ඌට මෙච්චර උඩ පේනවද ?? අඳුරගත්තද මංද.. ඔව්.. කළුවට මාත් එක්ක පෞද්ගලික ඇරියස් එකක් තියෙනව. කසිප්පු බීගෙන රෑට කෑගහනවට මං කැමති නෑ.. ඒකයි එදා ඌ නිදාගන්න තැනම කැත කලේ.. මං ඒක ඌට කලින් කිව්ව.. කියන කියන හැම පාරම මං දිලා ඔහේ බලං ඉන්නව ඇරෙන්න ඌ මුකුත් කිව්වද ?? මේ බස් වල ගෙරවිල්ලයි, එක වාහනයක් අනික් වාහනය දැක්කම සුභ පතන්න වගේ කෑ ගහන සද්දෙයි ඇරුනම, කළුව බීල කෑගහන එකයි හවසට පල්ලියෙ අඳෝනාවයි දෙකම ස්වභාවික නෑ කියලයි මං කියන්නෙ. ඔව්, මං ඒ දෙකටම කැමති නෑ. ඕනෙ නම් රහුමානියා එක ඉස්සරහ බලු නඩෙන් අහල බලන්න. වවුල්ලුන්ගෙන් අහල බලන්න. එකෙක්වත් ඔය සද්ද දෙකටම කැමති නෑ.
"හායි.."
ආ.. කවුද අප්ප මේ ?? කපුටු කෑල්ලක් උනාට මේකි අනික් උන්ට වඩා පොෂ් විදියට කතා කළේ. ඔඩෙල් එක පැත්තෙ සෙට් එකේ කෑල්ලක් වෙන්න ඇති. කෙල්ලගෙ වොයිස් එකත් පොෂ්..!! පොඩි ලයින් එකක් තියෙනව. මොකද කරන්නේ..... ම්ම්.. පස්සෙන් යනවද.. ඔන්නැහැ.. ගොඩක්දුරට බොරු මහන්සියක් විතරයි.. කපුටෙක් විදියට හොඳ සමාජ විවරණයක් තියෙන එකේ මේකි පස්සෙ ගිහිං ආප්ප කඩේ දානෙ මිස් කරගන්න ඕනෙ නැහැ.. කොහොමටත් මේ කාලෙ ගෑනියෙක් හොයාගත්තත් ලයිට් වයර් එකේ පය ගහල ඉන්න පුළුවන් ගෑනියෙක් නැත්නම් මේ ගේම ගහන්න බෑ. ගෑනු ගැන නම් කළුවගෙන් ආදර්ශ ගන්න එක තමා හොඳ මට හිතෙන විදියට.. ෆාතියා අනික් මුස්ලිම් ගෑනු වගේ සුදු නැත්තේ කළුවත් එක්ක නිදාගන්න නිසා නෙමේ. හරි හිත හොඳ ගෑනි. පොඩි එකා කළුවගෙ උනාට ලොකු එකා උගෙ නෙමේ කියල බැලුවම කියන්න පුළුවන්. පොඩි එවුන් දෙන්න හිඟාකන්න යවන්නෙ නැතිව තියාගන්න එකම මැදෑ. අනික කළුව රෑ බීල ආවත් නොබී ආවත් ඒකි කළුවට බෑ කියන්නෙ නෑ. ඔය ඔඩෙල් එකේ බෝඩ් එකේ ඉන්න බාගෙට රෙදි පොරවගත්ත, මහ අමුතු විදියට බලාගෙන ඉන්න කෙල්ලන්ට වඩා හොඳට කළුවට හලාල් වෙන්න ෆාතියා දන්නව. කවුරු නෑ කිව්වත් ෆාතියා ඒ අතින් බෝඩ් එකේ ඉන්න කෙල්ලන්ට වඩා රැඩිකල් කියලයි මට හිතෙන්නෙ..
මං මෙහෙම හිතන්නේ මම ටවුන් හෝල් එකේ ඉන්න කපුටෙක් නිසාද ?? මහඉස්පිරිතාලෙයි, පාර්ක් එකයි කියන්නේ මහ පුදුමාකාර තැන් කියල හිතෙන්නෙ නැද්ද ?? ෆාතිමාගෙ ලොකු එකා ඒ දේවල් දිහා බලං ඉන්නෙ ඌට ඒ දෙවල් තේරෙනව වගේ. පාර්ක් එකේ තුරුලු වෙලා ඉන්න ජෝඩු ඇත්තටම ආදරය කරනවද ? ඒකෙ ජෝඩු එලවන රස්සාව කරන ඇන්ටන් කියන්නෙ උන් එන්නෙ වලත්තකමට විතරයි කියල. ඇන්ටන්ගෙ වචන වලින්ම කිව්වොත් "පාර්ක් එකට එන උන්ට ඔනෙ බදාගෙන ලෙවකන්න විතරයි. උන්ට ගහක් කොලක් ගැනවත්, නවත්තල හෝන් ගහන අයිස්ක්‍රීම් කාරයො ගැනවත්, ළඟට ඇවිල්ල බලෙන් සාත්තර කියන ගෑනු ගැනවත්, හොරෙන් ජිල දාන ෂෝ මෑන්ල ගැනවත්, අඩුම ගානෙ උන්ගෙ පුකට විදින කඩිය ගැනවත් ගානක් නෑ.. වේල් හත අටක් හාමතේ ඉඳපු එකෙක්ට බුරියානි එකක් හම්බුනා වගේ තමා මුංට ගෑනි ඔඩොක්කුවෙන් තියාගත්තම පුහ්.. අපි නගරෙ සභාවෙ වැඩකරත් අපි ඔයිට වඩා හොඳට ගෑනු ගාව ඉන්නව.. ".
ඇන්ටන් කියන කතාව බොරු කියල කියන්න බෑ. හැබැයි පඩි ගන්න දවසට ෆාතියා හරි සීලිං අක්කව හරි රඟමඩල පැත්තට ගෙන්න ගත්තම ඇන්ටන් ඔයිට හපං.. වියදම් කරන රුපියල් දෙසීයට හරියන්න ඉන්න තරම්වත් ඉවසීමක් ඌට නෑ..කොටින්ම මම ඒක දිහා බලං ඉන්නව කියල දැක්කත් ඇන්ටන් කවදාවත් මාව එලවල නෑ..
"අඩෝ.. වරෙන් ඉස්පිරිතාලෙ පැත්තෙ යන්න.. කානුව සරුයිලු.."
යාළුවෙක් කතා කරගෙනම ගියා.. පර්ක් එකේ කුනු බක්කි හිස් උනත් ඉස්පිරිතාලෙ කානුව නම් හිස් වෙන්න නෑ කියල ඕනෙ කපුටෙක් දන්නව. ඒ ලේ රහට, කුණු මස් රහට පුරුදු උනාම ගැලවෙන්නත් අමාරුයි.. ඒත් මං යන්නෙ නෑ.. ඔව්.. මීට සතියකට කලිං මං ඒ තීරණය ගත්ත එක ගැන, මට තාම අවුලක් දැනිල නෑ. ෆාතියා එයාගෙ තුන් වෙනි ලමයා ඉපදුනු ගමන්ම කළුවරේම ඒ කානුවට දැම්ම කියල මම දැනගත්තෙ කළුව බීල දොඩවනකොට. ඒක ස්ථිර උනේ ෆාතිමාම ඒක ඇන්ටන්ට කිව්ව එක අහන් හිටපු වෙලාවෙ. මුළු ජීවිත කාලෙටම මට ඔක්කාරෙට ආවෙ එදා.. ඔව්.. මට තාම මතකයි කළුවරේ රෙද්ද හද හද ඒකි ඒක කියපු හැටි...
........."මෙට දුකක් නේ යෙන්ටන් අයියා.. යේක ලොක්කූ උනත් මේ අපේයෙම නේ.. මෙට තව යෙකෙක්ට කරන්න බේ බං.. මෙට දුක කානුවට දාල බලන්නත් කෙලින්ම කපුටො කොට කොටා කාපු එක අයියා.. යෙනේ... යෙතකොට තමායි ඌ ඇඬුවෙ ඇන්ටන් අයියා.. අප්පේ... "
