සඳවතී..

නග්න ඌ කඳු මැදින්

අඩ නෙතින් බලන්නී

ඉරී ගිය ස්වේත සළු

ගෙන කඳුළු පිසින්නී

එකම එක ඉඟියකින්

කැඳවන්න මා

සඳවතී..

අසිත ගෑ සිතුවමක

සීත පිණි සිපගන්න

මුළු රැයම මගේ යැයි

සරදමට හිනැහෙන්න

තව එකම එක වරක්

කඳු යාය මැද ඉන්න..

දුර ඇදෙන්නට කලින්

මට තුරුල් වී හුන්න

සඳවතී ඇවිත් මේ

වළා පට ගෙන යන්න

හඬන්නේ මා නොවෙයි

රැහැයියනි පවසන්න..

අසම්මත

සීත හිම වලා විසිරුණු

අපිළිවෙල අහස් ගැබ මත

සොයා යන්නෙම්

විඳිමි ගිනියම්

අසම්මත පෙම

හිරුට බියෙන් හැකිලෙන

සීත වියැකෙන පිණි පොද

විසල් හුස්මට ඇදී විත්

ගැටෙන නෙතු පිය අග

අසම්මත ගමනක

හැඟුම් මහමෙර පවසන

සඬ මඩල අද ගිනිගෙන

උණුසුමින් සැනසෙන්න දැන් වත්

වෙලා මිහිදුම් සළුවෙන්

අසම්මත නිරුවත